ازاي تشتغل من البيت :D ركزوا معايا الموضوع فيه فلوس
..
من أحد المميزات في العمل الحر "#Freelance” انك ممكن تشتغل في اي وقت ومن اي مكان، فدا بيبقى فرصة كويسة جدًا خصوصًا للطلاب لأنه بيساعد في توفير مصدر دخل بديل وفي حالات كتير ممكن يغني عن الوظائف الثابتة لأن العائد بتاعه بيبقى كويس مقارنة بالوظائف الثابتة. شخصيًا بقالي أكتر من سنة بشتغل في مجال الكتابة من البيت.. الموضوع سهل جدًا بس محتاج شوية صبر ومهارات بسيطة في الاول.
..
مجالات العمل من المنزل:
كل مجالات الوظائف الثابتة موجودة اونلاين وبتعملها عن طريق النت، دول أشهر المجالات اللى ممكن تشتغلوا فيها: الكتابة أو صناعة المحتوى – التصميم والفيديو والجرافيكس بشكل عام – التسويق والمبيعات – البرمجة والشبكات – التعليم زي انك تعلم ناس مهارة أو حرفة أو حتى الطبخ :D - التدريب والاستشارات – بيع المنتجات الرقمية – إدخال البيانات .. وفي مجالات تانية كتير متاحة بردو للعمل زي مثلا سكرتير من البيت لدكتور أو رجل أعمال أو شخص بتنظمله مواعيده وكدا وانت قاعد في البيت :D
..
ازاي تبدأ شغل من البيت؟
في طرق كتير ممكن تبدأ بيها، أكثرهم صعوبة خصوصًأ للمبتدأين، انك تكون عارف حد محتاج freelancers فتكلمه وتبدأ تشتغل معاه زي مثلا موقع معين يكون طالب كتّاب فتقدم دي طريقة وانت وشطارتك..
الطريقة التانية اللى متاحة بشكل مستمر هي من خلال مواقع العمل الحر، ودي مواقع كتير جدًا ومنتشرة في منها مواقع أجنبية زي elance و Upwork بس عن نفسي مش بستخدمهم لأن مستوى التنافسية فيهم عالي ومبعرفش اجيب فرص من عليه :D وفي مواقع عربي ودول كويسين جدًا وأي حد يقدر يشتغل من عليهم.. أشهرهم موقع مستقل ودا عليه أكتر من 30 ألف مستقل في مجالات مختلفة، وموقع خمسات ودا عليه أكتر من 300 ألف شخص... في مواقع عربية تانية بس دول الأكثر شعبية
..
موقع مستقل
مستقل هو موقع للعمل الحر بيجمع بين مستقلين اللي هما الناس اللى بتدور على فرص عمل من البيت، وبين أصحاب أعمال محتاجين مستقلين يقوموا بالشغل اللى محتاجينه مقابل عائد مادي كويس. دا لينك الموقع:
www.mostaql.com
طريقة العمل على الموقع، ان اصحاب المشاريع بيعلنوا عن المشروعات دي بالتفاصيل المطلوب انجازها والميزانية "أقل مشروع ع الموقع بيكون ب 25 دولار وعمولة الموقع 15 % من ميزانية كل مشروع بيتم خصمها من المستقل"، والمستقلين او الباحثين عن عمل بيدخلوا على المشروعات اللى تناسبهم ويبدأوا يقدموا عليها ويحطوا عروضهم، وصاحب المشروع يختار من الناس اللى مقدمين.
الخطوات اللى تعملها عشان تشوف مشروعات تشترك فيها ع الموقع:
أول حاجة تعمل حساب جديد على الموقع، بعد كدا تظبط كل البيانات الخاصة بيك وتستخدم اسمك الحقيقي وتحط تعريف مناسب بيك بيلخص معرفتك ومهاراتك اللى تعرف تعملها، وبردو تختار المجال اللى انت متخصص فيه.. لو انت بتعرف تعمل اكتر من حاجة اختار أفضلهم واتخصص فيها بس بلاش تدور على شغل في كل المجالات يعني :D
بردو من الحاجات المهمة قبل ما تبدأ تبحث عن مشروعات على الموقع انك تظبط معرض الأعمال بتاعك على حسابك الشخصي، دا بتحط فيه أهم الأعمال والخبرات اللى انت قمت بيها قبل كدا، يعني لو انت كاتب ونشرت مقالات في مواقع قبل كدا حط لينكات المواقع دي او موضوعاتك بشكل مباشر، لو مصمم حط التصميمات بتاعتك قبل كدا وهكذا.. لأن أصحاب الأعمال بيدوروا على المعرض دا لأنه بيمثل الـcv أو مدى جودة المهارة اللى بتمتلكها فاوعى تسيب الخانة دي فاضية.. اوعى :D
#ع_الهامش: لو انت ملكش أعمال سابقة منشورة في مجال الكتابة، حاول تكتب وتنشر موضوعات في أي مواقع بتتيح النشر للجمهور زي مقال كلاود أو ساسة بوست أو أراجيك أو حتى لو ليك مدونة شخصية، ولو انت مصمم اعمل اكونت على بيهانس وحط عليه اعمالك وحطها في حسابك على مستقل.
..
بعد ما تظبط بروفايلك على الموقع، ابدأ ابحث عن المجال اللى انت متخصص فيه وشوف المشروعات المتاحة واللى يناسبك قدم فيه، بس خلي بالك وانت بتقدم لازم تكتب وصف جذاب كدا يخلي صاحب العمل يختارك، ويكون بيعبر عن خبرتك ومهارتك وليه تستحق انك انت اللى تنفذ المشروع دا.. كمان بتحدد الوقت اللازم لتسليم المشروع لو اتوافق عليك والمبلغ اللى انت طالبه. “في شوية نصايح مهمة هتلاقوها في اخر البوست عشان في أخطاء كتير بتحصل في الموضوع دا خصوصًا تحديد السعر".
…
من المواقع الكويسة بردو غير مستقل موقع خمسات دا لينك الموقع:
www.khamsat.com
طريقة عمل خمسات عكس مستقل، خمسات عبارة عن سوق لبيع وشراء الخدمات المصغرة. يعني انت مثلًا بتعرف تكتب تقوم داخل عامل خدمة جديدة انك تكتب مقال في أي مجال الخدمة دي تكلفتها بتبقى 5 دولار لكل واحد بيشتريها وعمولة الموقع بتبقى 1 دولار أو 20 % يعني من كل خدمة بيتم بيعها وبيتم احتسابها من اللى بيقدم الخدمة يعني انت بتحصل على 4 $ من كل شخص بيشتري خدمتك.
ممكن تعرض خدماتك في مجال الكتابة، التصميم، الاستشارة، التدريب، تعليم الطبخ... الخ، خدوا جولة في الموقع وشوفوا انواع الخدمات المقدمة.. ممكن تقدموا خدمات زي انك تعرف الناس ازاي يحصلوا على منحة دراسية، أو تصميم كفر للفيسبوك، أو كتابة مقال أو ترجمة موضوع أو تعليم طبخة جديدة ... الخ. عيشوا حياتكم يعني :D بس الأهم بردو انكم تظبطوا الحساب والبروفايل بتاعكم على الموقع الأول عشان اللى ياخد أي جولة فيه يعرف انه هيتعامل مع شخص محترف مش مجرد هاوي.
….
نصايح عامة:
- مش معنى انك هتشتغل من البيت ان دا هيعطلك عن المذاكرة أو الدراسة، لا ابسلوتلي انت بتشتغل أثناء وقت فراغك.. عن نفسي مش بشتغل أكتر من 4 ساعات في الأسبوع أثناء الدراسة ودا موفرلي وقت للدراسة ووقت شخصي وبردو العائد المادي الى حد ما كويس ومكفيني والحمد لله :D
- الموضوع صعب في الاول بس محتاج شوية صبر، مش بمجرد ما تقرر تشتغل من البيت هتلاقي الشغل مستنيك، لا اتعب شوية وابحث ودور لحد ما تلاقي مش يومين وتكسل يعني..
- قبل ما تبدأ أو تقرر تشتغل من البيت، أثقل مهاراتك الأول، يعني لو مهاراتك ضعيفة في التصميم يبقى كمل تعليم تصميم لحد ما تبقى كويس وبعد كدا ابدأ اشتغل، لو كتابة يبقى كذلك وهكذا.. ممكن تتعلموا أونلاين أي مجال انتو عايزين تتعلموه سواء تسويق أو كتابة أو برمجة أو جرافيكس.... الخ. هتلاقوا مواقع كتير، وممكن تجربوا موقع أكاديمية حسوب بينزلوا موضوعات كتير في مجالات العمل الحر المختلفة يعني ممكن تتعلموا مجال من خلال المقالات اللى بتنزل ع الاكاديمية وكمان بينزلوا نصايح وخبرات مستقلين كتير في مجالات العمل الحر
دا لينك الموقع: http://academy.hsoub.com/
- الفلوس القليلة ملهاش اي علاقة بقبولك في المشروع.. يعني لو المشروع ميزانيته 100 $ وانت قلت انا هعمله ب 10 $ دا مش معناه ان صاحب العمل هيختارك عشان هتوفرله، لا دا معناه انك لسه جديد في المجال أو انك هتطلع الشغل بجودة زي الزفت بما انك طالب فلوس قليلة اوي كدا :D ابحث الأول عن متوسط الأسعار في المجال بتاعك عشان تعرف صح، وكمان منطقيًا لما صاحب العمل يحط ميزانية المشروع مثلا 100 دولار يبقى انت يا تقلل شوية يا تزود شوية انما مش تيجي تقول 10 أو تقول 200 ! خليك منطقي
- تحديد وقت تسليم الشغل بدقة دا لازم، وبردو خد وقتك يعني لو شغل هياخد منك 10 ايام وصاحب العمل نفسه عارف انه يستحيل هياخد اقل من الوقت دا، متجيش انت تعرض انك تعمله في يومين، كدا بردو هيعتقد انك هتكروته عشان تسلم في الوقت المتاح :D
- آخر حاجة، لو ربنا كرمك وحصلت على أول عميل ليك امسك فيه بايدك وسنانك عشان اما يحتاج شغل تاني يرجعلك، انا كل المشاريع اللى سلمتها على مستقل من عميل واحد فقط.. اتواصل مع عملائك بشكل دايم وسلمهم شغل نضيف وفي المعاد ولو في تعديلات ظبطها بحيث انك تبقى على قدر توقعاتهم، كل ما علاقاتك مع العملاء بقت أحسن كل ما فرص إعادة توظيفك في مشاريع تانية زادت.
…
كفاية دول عن العمل من البيت، ابدأوا شوفوا انتو شاطرين في ايه، أو المجال اللى بتحبوه واتعلموا عنه واشتغلوا فيه بدل ما تفضلوا معتمدين على المصروف، الموضوع سهل بس محتاج شوية صبر ليس أكثر..
#اتعلم #اتشقلب #اشتغل
#حبة_علم
..
من أحد المميزات في العمل الحر "#Freelance” انك ممكن تشتغل في اي وقت ومن اي مكان، فدا بيبقى فرصة كويسة جدًا خصوصًا للطلاب لأنه بيساعد في توفير مصدر دخل بديل وفي حالات كتير ممكن يغني عن الوظائف الثابتة لأن العائد بتاعه بيبقى كويس مقارنة بالوظائف الثابتة. شخصيًا بقالي أكتر من سنة بشتغل في مجال الكتابة من البيت.. الموضوع سهل جدًا بس محتاج شوية صبر ومهارات بسيطة في الاول.
..
مجالات العمل من المنزل:
كل مجالات الوظائف الثابتة موجودة اونلاين وبتعملها عن طريق النت، دول أشهر المجالات اللى ممكن تشتغلوا فيها: الكتابة أو صناعة المحتوى – التصميم والفيديو والجرافيكس بشكل عام – التسويق والمبيعات – البرمجة والشبكات – التعليم زي انك تعلم ناس مهارة أو حرفة أو حتى الطبخ :D - التدريب والاستشارات – بيع المنتجات الرقمية – إدخال البيانات .. وفي مجالات تانية كتير متاحة بردو للعمل زي مثلا سكرتير من البيت لدكتور أو رجل أعمال أو شخص بتنظمله مواعيده وكدا وانت قاعد في البيت :D
..
ازاي تبدأ شغل من البيت؟
في طرق كتير ممكن تبدأ بيها، أكثرهم صعوبة خصوصًأ للمبتدأين، انك تكون عارف حد محتاج freelancers فتكلمه وتبدأ تشتغل معاه زي مثلا موقع معين يكون طالب كتّاب فتقدم دي طريقة وانت وشطارتك..
الطريقة التانية اللى متاحة بشكل مستمر هي من خلال مواقع العمل الحر، ودي مواقع كتير جدًا ومنتشرة في منها مواقع أجنبية زي elance و Upwork بس عن نفسي مش بستخدمهم لأن مستوى التنافسية فيهم عالي ومبعرفش اجيب فرص من عليه :D وفي مواقع عربي ودول كويسين جدًا وأي حد يقدر يشتغل من عليهم.. أشهرهم موقع مستقل ودا عليه أكتر من 30 ألف مستقل في مجالات مختلفة، وموقع خمسات ودا عليه أكتر من 300 ألف شخص... في مواقع عربية تانية بس دول الأكثر شعبية
..
موقع مستقل
مستقل هو موقع للعمل الحر بيجمع بين مستقلين اللي هما الناس اللى بتدور على فرص عمل من البيت، وبين أصحاب أعمال محتاجين مستقلين يقوموا بالشغل اللى محتاجينه مقابل عائد مادي كويس. دا لينك الموقع:
www.mostaql.com
طريقة العمل على الموقع، ان اصحاب المشاريع بيعلنوا عن المشروعات دي بالتفاصيل المطلوب انجازها والميزانية "أقل مشروع ع الموقع بيكون ب 25 دولار وعمولة الموقع 15 % من ميزانية كل مشروع بيتم خصمها من المستقل"، والمستقلين او الباحثين عن عمل بيدخلوا على المشروعات اللى تناسبهم ويبدأوا يقدموا عليها ويحطوا عروضهم، وصاحب المشروع يختار من الناس اللى مقدمين.
الخطوات اللى تعملها عشان تشوف مشروعات تشترك فيها ع الموقع:
أول حاجة تعمل حساب جديد على الموقع، بعد كدا تظبط كل البيانات الخاصة بيك وتستخدم اسمك الحقيقي وتحط تعريف مناسب بيك بيلخص معرفتك ومهاراتك اللى تعرف تعملها، وبردو تختار المجال اللى انت متخصص فيه.. لو انت بتعرف تعمل اكتر من حاجة اختار أفضلهم واتخصص فيها بس بلاش تدور على شغل في كل المجالات يعني :D
بردو من الحاجات المهمة قبل ما تبدأ تبحث عن مشروعات على الموقع انك تظبط معرض الأعمال بتاعك على حسابك الشخصي، دا بتحط فيه أهم الأعمال والخبرات اللى انت قمت بيها قبل كدا، يعني لو انت كاتب ونشرت مقالات في مواقع قبل كدا حط لينكات المواقع دي او موضوعاتك بشكل مباشر، لو مصمم حط التصميمات بتاعتك قبل كدا وهكذا.. لأن أصحاب الأعمال بيدوروا على المعرض دا لأنه بيمثل الـcv أو مدى جودة المهارة اللى بتمتلكها فاوعى تسيب الخانة دي فاضية.. اوعى :D
#ع_الهامش: لو انت ملكش أعمال سابقة منشورة في مجال الكتابة، حاول تكتب وتنشر موضوعات في أي مواقع بتتيح النشر للجمهور زي مقال كلاود أو ساسة بوست أو أراجيك أو حتى لو ليك مدونة شخصية، ولو انت مصمم اعمل اكونت على بيهانس وحط عليه اعمالك وحطها في حسابك على مستقل.
..
بعد ما تظبط بروفايلك على الموقع، ابدأ ابحث عن المجال اللى انت متخصص فيه وشوف المشروعات المتاحة واللى يناسبك قدم فيه، بس خلي بالك وانت بتقدم لازم تكتب وصف جذاب كدا يخلي صاحب العمل يختارك، ويكون بيعبر عن خبرتك ومهارتك وليه تستحق انك انت اللى تنفذ المشروع دا.. كمان بتحدد الوقت اللازم لتسليم المشروع لو اتوافق عليك والمبلغ اللى انت طالبه. “في شوية نصايح مهمة هتلاقوها في اخر البوست عشان في أخطاء كتير بتحصل في الموضوع دا خصوصًا تحديد السعر".
…
من المواقع الكويسة بردو غير مستقل موقع خمسات دا لينك الموقع:
www.khamsat.com
طريقة عمل خمسات عكس مستقل، خمسات عبارة عن سوق لبيع وشراء الخدمات المصغرة. يعني انت مثلًا بتعرف تكتب تقوم داخل عامل خدمة جديدة انك تكتب مقال في أي مجال الخدمة دي تكلفتها بتبقى 5 دولار لكل واحد بيشتريها وعمولة الموقع بتبقى 1 دولار أو 20 % يعني من كل خدمة بيتم بيعها وبيتم احتسابها من اللى بيقدم الخدمة يعني انت بتحصل على 4 $ من كل شخص بيشتري خدمتك.
ممكن تعرض خدماتك في مجال الكتابة، التصميم، الاستشارة، التدريب، تعليم الطبخ... الخ، خدوا جولة في الموقع وشوفوا انواع الخدمات المقدمة.. ممكن تقدموا خدمات زي انك تعرف الناس ازاي يحصلوا على منحة دراسية، أو تصميم كفر للفيسبوك، أو كتابة مقال أو ترجمة موضوع أو تعليم طبخة جديدة ... الخ. عيشوا حياتكم يعني :D بس الأهم بردو انكم تظبطوا الحساب والبروفايل بتاعكم على الموقع الأول عشان اللى ياخد أي جولة فيه يعرف انه هيتعامل مع شخص محترف مش مجرد هاوي.
….
نصايح عامة:
- مش معنى انك هتشتغل من البيت ان دا هيعطلك عن المذاكرة أو الدراسة، لا ابسلوتلي انت بتشتغل أثناء وقت فراغك.. عن نفسي مش بشتغل أكتر من 4 ساعات في الأسبوع أثناء الدراسة ودا موفرلي وقت للدراسة ووقت شخصي وبردو العائد المادي الى حد ما كويس ومكفيني والحمد لله :D
- الموضوع صعب في الاول بس محتاج شوية صبر، مش بمجرد ما تقرر تشتغل من البيت هتلاقي الشغل مستنيك، لا اتعب شوية وابحث ودور لحد ما تلاقي مش يومين وتكسل يعني..
- قبل ما تبدأ أو تقرر تشتغل من البيت، أثقل مهاراتك الأول، يعني لو مهاراتك ضعيفة في التصميم يبقى كمل تعليم تصميم لحد ما تبقى كويس وبعد كدا ابدأ اشتغل، لو كتابة يبقى كذلك وهكذا.. ممكن تتعلموا أونلاين أي مجال انتو عايزين تتعلموه سواء تسويق أو كتابة أو برمجة أو جرافيكس.... الخ. هتلاقوا مواقع كتير، وممكن تجربوا موقع أكاديمية حسوب بينزلوا موضوعات كتير في مجالات العمل الحر المختلفة يعني ممكن تتعلموا مجال من خلال المقالات اللى بتنزل ع الاكاديمية وكمان بينزلوا نصايح وخبرات مستقلين كتير في مجالات العمل الحر
دا لينك الموقع: http://academy.hsoub.com/
- الفلوس القليلة ملهاش اي علاقة بقبولك في المشروع.. يعني لو المشروع ميزانيته 100 $ وانت قلت انا هعمله ب 10 $ دا مش معناه ان صاحب العمل هيختارك عشان هتوفرله، لا دا معناه انك لسه جديد في المجال أو انك هتطلع الشغل بجودة زي الزفت بما انك طالب فلوس قليلة اوي كدا :D ابحث الأول عن متوسط الأسعار في المجال بتاعك عشان تعرف صح، وكمان منطقيًا لما صاحب العمل يحط ميزانية المشروع مثلا 100 دولار يبقى انت يا تقلل شوية يا تزود شوية انما مش تيجي تقول 10 أو تقول 200 ! خليك منطقي
- تحديد وقت تسليم الشغل بدقة دا لازم، وبردو خد وقتك يعني لو شغل هياخد منك 10 ايام وصاحب العمل نفسه عارف انه يستحيل هياخد اقل من الوقت دا، متجيش انت تعرض انك تعمله في يومين، كدا بردو هيعتقد انك هتكروته عشان تسلم في الوقت المتاح :D
- آخر حاجة، لو ربنا كرمك وحصلت على أول عميل ليك امسك فيه بايدك وسنانك عشان اما يحتاج شغل تاني يرجعلك، انا كل المشاريع اللى سلمتها على مستقل من عميل واحد فقط.. اتواصل مع عملائك بشكل دايم وسلمهم شغل نضيف وفي المعاد ولو في تعديلات ظبطها بحيث انك تبقى على قدر توقعاتهم، كل ما علاقاتك مع العملاء بقت أحسن كل ما فرص إعادة توظيفك في مشاريع تانية زادت.
…
كفاية دول عن العمل من البيت، ابدأوا شوفوا انتو شاطرين في ايه، أو المجال اللى بتحبوه واتعلموا عنه واشتغلوا فيه بدل ما تفضلوا معتمدين على المصروف، الموضوع سهل بس محتاج شوية صبر ليس أكثر..
#اتعلم #اتشقلب #اشتغل
#حبة_علم
تعليقات
إرسال تعليق